Իսպանիայի ներքին գործերի նախարարության տվյալով՝ հուլիսի 30-ից ցամաքային և ծովային ճանապարհով շուրջ 50 հազար մարդ անկանոն կերպով մուտք է գործել Հյուսիսային Աֆրիկայում գտնվող իսպանական Սեուտա։ Քաղաքի ղեկավարի գնահատմամբ՝ անցածների թիվը կարող էր հասնել մինչև 60 հազարի։ Իսպանական կողմում հայտնաբերվել է 57 զոհվածի մարմին։ Նրանց մի մասը խեղդվել էր, մյուսները՝ զոհվել սահմանային պատնեշի մոտ առաջացած հրմշտոցի ժամանակ։
Իսպանիայի իշխանությունների փոխանցմամբ՝ ուրբաթ երեկոյան սահմանը հատածներից շուրջ 48,300-ն արդեն կամավոր վերադարձել էր Մարոկկո։ Սահմանային վերահսկողությունն ուժեղացնելու համար Սեուտայում տեղակայվել են լրացուցիչ ոստիկաններ և զինվորականներ։ Վարչապետ Պեդրո Սանչեսը տեղի ունեցածը որակել է որպես «Իսպանիայի տարածքային ինքնիշխանության խախտում» և հայտարարել վերադարձի գործընթացն արագացնելու մասին։
Դեռ ամբողջությամբ պարզ չէ, թե ինչն է տասնյակ հազարավոր մարդկանց միաժամանակ սահմանը հատել։ Իսպանական իշխանությունները հնարավոր գործոններից մեկը կապում են Գերագույն դատարանի որոշման մասին տարածված մեկնաբանության հետ, թե ծովով Սեուտա հասած մարդկանց հնարավոր չէ անմիջապես վերադարձնել առանց համապատասխան իրավական ընթացակարգի։ Ըստ իշխանությունների՝ այս տեղեկությունն օգտագործել են նաև մարդկանց տեղափոխմամբ զբաղվող ցանցերը։
Սոցիալ-տնտեսական համատեքստը ևս կարևոր է։ Մարոկկոյում 15–24 տարեկանների գործազրկությունը 2025-ին կազմել է 37.2%։ Շատ երիտասարդներ փորձում են Եվրոպա հասնել աշխատանքի և ավելի բարձր եկամուտ ստանալու նպատակով։
Ճգնաժամը տարաձայնություններ է առաջացրել նաև Եվրամիությունում։ Իտալիան ժամանակավորապես վերականգնել է Իսպանիայից օդային և ծովային ճանապարհով ժամանողների սահմանային ստուգումները, իսկ Մադրիդը բողոք է հայտնել և կանչել Իտալիայի դեսպանին։
Սեուտան և Մելիլյան Իսպանիայի ինքնավար քաղաքներ են Հյուսիսային Աֆրիկայում։ Մարոկկոյի հետ դրանց սահմանները Եվրոպական միության միակ ցամաքային սահմաններն են աֆրիկյան մայրցամաքում և պարբերաբար դառնում են դեպի Եվրոպա անցնելու փորձերի վայր։
Ամփոփ Մեդիա
ՈՒՇԱԴՐՈՒԹՅՈՒՆ © Ampop.am կայքի նյութերն ու «Ամփոփ Մեդիա» տարբերանշանը կրող վիզուալ պատկերներն այլ աուդիովիզուալ հարթակներում հրապարակել հնարավոր է միմիայն «Ամփոփ Մեդիայի» և/կամ ԼՀԱ-ի ղեկավարության հետ համապատասխան համաձայնության դեպքում:
Փորձագետի կարծիք
Հրապարակվել է` 31/07/2026
