Ընտանեկան և սոցիալական նպաստ ստացող ընտանիքների թիվը Հայաստանի Հանրապետությունում վերջին վեց տարում նվազել է ավելի քան 34,000-ով կամ 1.5 անգամ։ Տվյալները ՀՀ Վիճակագրական կոմիտեինն են։

«Ամփոփ Մեդիա»-ն ուսումնասիրել է երկրի նպաստառու ընտանիքների թվին, նրանց աշխարհագրական տեղաբաշխվածութանը և պետբյուջեով նախատեսված վճարումներին վերաբերող վիճակագրական տվյալները։

Մասնավորապես, դուրս ենք բերել Երևանում և Հայաստանի տարբեր մարզերում պետությունից ընտանեկան և սոցիալական նպաստ ստացող ընտանիքների թվաքանակը՝ սկսած 2018թ-ից՝ դիտարկելու դինամիկան՝ ըստ տարիների։ Նաև հաշվել ենք, թե միջինում որքան գումար է նախատեսված պետբյուջեով 2024-ին այս ընտանիքներին վճարելու համար։

Պետական նպաստը պետության կողմից պարբերաբար կամ միանվագ տրամադրվող դրամական օգնություն է պետական բյուջեի միջոցներից։

Նպաստների տրամադրման նպատակն է օժանդակել անապահով ընտանիքների կենսամակարդակի բարձրացմանը կամ կանխել դրա վատթարացումը։

Տվյալների վերլուծությունը ցույց է տալիս, որ 2018-2024 թթ-ին՝ յուրաքանչյուր տարի, ընտանեկան և սոցիալական նպաստ ստացող ընտանիքների թիվը միջին հաշվով կրճատվել է 5.2 %-ով։

Ընտանեկան և սոցիալական նպաստ ստանալու իրավունքը դադարեցվում է՝

1) ընտանիքի անապահովության սահմանային միավորից իջնելու դեպքում,
2) դիմողի կողմից սահմանված ժամկետում տարածքային կենտրոն անհրաժեշտ փաստաթղթերը չներկայացնելու դեպքում,
3) ընտանեկան/սոցիալական նպաստն անընդմեջ 3 ամիս անհարգելի պատճառով չստանալու դեպքում,
4) ընտանիքի կամ ընտանիքի անդամներից որևէ մեկի՝ ընտանիքների անապահովության գնահատման համակարգում կրկնակի հաշվառման դեպքում:

Ամենաշատ ընտանեկան նպաստ ստացող ընտանիքները բնակվում են Գեղարքունիքի (16․5%), Շիրակի (15․8%) և Լոռու (14․6%) մարզերում, ամենաքիչը՝ Սյունիքում (3%) և Վայոց Ձորում (2․2%)։

Սոցիալական նպաստ ստացող ամենաշատ ընտանիքները Երևանում (26․3%), Լոռիում (18․4%) և Շիրակում (13․6%) են, ամենաքիչը՝ Արագածոտնում (3․5%) և Վայոց Ձորում (2%)։

Տեքստն ու վիզուալիզացիան՝ Լուսինե Շադյանի, Կարինե Դարբինյանի
Մենթոր՝ Կարինե Դարբինյան

Այս նյութը պատրաստվել է Ամփոփ Մեդիայի կողմից՝ «Պրոֆեսիոնալ մեդիան և քաղհասարակությունը միավորում են ուժերը՝ հանուն երկխոսության» ծրագրի շրջանակում, որն իրականացվում է Հանրային լրագրության ակումբի կողմից՝ Եվրոպական հանձնաժողովի ֆինանսավորմամբ։ Այստեղ արտահայտված տեսակետները պատկանում են հեղինակին (հեղինակներին) և պարտադիր չէ, որ արտահայտեն Եվրոպական միության պաշտոնական տեսակետը։

Կարդացեք նաև

• Բուժման նպատակով ՀՀ ժամանող զբոսաշրջիկների թիվն աճել է շուրջ 5 անգամ
• Բենզինն ու դիզելը թանկացել են, այլ վառելանյութերը՝ էժանացել
• Օղին թանկացել է, գինին՝ էժանացել․ հունվար-հուլիս, 2024թ․
• Ռեստորանային ու հյուրանոցային ծառայությունները թանկացել են 3.1%-ով
• Մեկ տարում տրանսպորտը թանկացել է 10%-ով․
• ՀՀ-ում աղքատ երեխաների թիվը չի նվազել, իսկ Արմավիրում աղքատության մակարդակը կրկնակի աճել է 2019-ի համեմատ

ՈՒՇԱԴՐՈՒԹՅՈՒՆ © Ampop.am կայքի նյութերն ու «Ամփոփ Մեդիա» տարբերանշանը կրող վիզուալ պատկերներն այլ աուդիովիզուալ հարթակներում հրապարակել հնարավոր է միմիայն «Ամփոփ Մեդիայի» և/կամ ԼՀԱ-ի ղեկավարության հետ համապատասխան համաձայնության դեպքում:

Հրապարակվել է` 20/09/2024