Ուկրաինայի նախագահ Վոլոդիմիր Զելենսկին ապրիլի 25-ին պաշտոնական այցով ժամանել է Ադրբեջան։ Սա նրա առաջին ուղևորությունն է Հարավային Կովկաս 2022 թվականի փետրվարին Ռուսաստանի սանձազերծած լիամասշտաբ պատերազմից ի վեր։
Գաբալա քաղաքում Իլհամ Ալիևի հետ հանդիպման ընթացքում ուկրաինական կողմի օրակարգի հիմքում ռազմական համագործակցությունն ու էներգետիկ անվտանգությունն են։
Ռազմական փորձի փոխանակում և ՀՕՊ ոլորտ
Ինչպես հաղորդում է Kyiv Independent-ը, Կիևն արդեն իսկ ռազմական մասնագետների խումբ է գործուղել Ադրբեջան՝ փոխանցելու հակաօդային պաշտպանության (ՀՕՊ) ոլորտում Ուկրաինայի եզակի փորձը։
Այցի շրջանակում նախագահ Զելենսկին հանդիպել է նաև ուկրաինական փորձագիտական թիմին։
«Ուկրաինան մշտապես ձգտում է այնպիսի համագործակցության, որն կուժեղացնի թե՛ մեզ, թե՛ մեր գործընկերներին։ Մենք ունենք անվտանգային եզակի փորձ, որը կարող է օգտակար լինել այլ պետությունների համար»,- նշել է Ուկրաինայի նախագահը՝ հավելելով, որ համագործակցության առաջնահերթ ուղղություններից մեկը Ադրբեջանն է։
Էներգետիկա և տնտեսական գործընկերություն
Mezha.net-ի փոխանցմամբ՝ բանակցությունների կարևորագույն թեմաներից է էներգետիկ կարողությունների ընդլայնումն ու մատակարարումների դիվերսիֆիկացումը։ Կողմերն աշխատում են երկկողմ համագործակցության հինգ նոր համաձայնագրերի շուրջ, որոնք միտված են ամրապնդելու երկու երկրների տնտեսական կայունությունն ու էներգետիկ անկախությունը՝ հաշվի առնելով տարածաշրջանային մարտահրավերները։
Անվտանգային նոր ձևաչափեր և ԱԹՍ տեխնոլոգիաներ
Այս այցը հաջորդում է Զելենսկու՝ ապրիլի 24-ին Սաուդյան Արաբիա կատարած ուղևորությանը, որտեղ քննարկվել է անվտանգային և ԱԹՍ տեխնոլոգիաների ոլորտում գործակցությունը։ Ուկրաինայի ԱԳ նախարար Անդրեյ Սիբիգան ընդգծել է, որ Ուկրաինան իր ռազմական ներուժով կարող է դառնալ եվրոպական անվտանգության կարևոր բաղադրիչ, իսկ տարածաշրջանային պաշտպանական դաշինքները Հարավային Կովկասի երկրների հետ ունեն լայն հեռանկարներ։
Ամփոփ Մեդիա
ՈՒՇԱԴՐՈՒԹՅՈՒՆ © Ampop.am կայքի նյութերն ու «Ամփոփ Մեդիա» տարբերանշանը կրող վիզուալ պատկերներն այլ աուդիովիզուալ հարթակներում հրապարակել հնարավոր է միմիայն «Ամփոփ Մեդիայի» և/կամ ԼՀԱ-ի ղեկավարության հետ համապատասխան համաձայնության դեպքում:
Փորձագետի կարծիք
Հրապարակվել է` 25/04/2026
