Մարիան Ստեփանակերտի Խ.Աբովյանի անվան թիվ 1 հիմնական դպրոցի նախակրթական խմբի սաներից է:
Արցախի շրջափակումից օրեր առաջ ընտանիքով մեկնել էին Երևան: Հայրն առողջական լուրջ խնդիր ուներ, պետք էր շտապ վիրահատվեր:
Ապաքինվելուց հետո Մարիայի հայրը՝ Արմենը վերադարձել էր Արցախ: Մայրիկի և փոքրիկ եղբոր հետ Մարիան մնացել էր Երևանում՝ տնից հեռու, կիսված ընտանիքով՝ շուրջ ինն ամիս:
«Պապուն նըհետ միշտ կըրեցալ չում խոսիմ, որովհետև Արցախում լուսերը շատըն իլալ անջատելիս: Բայց հիբը խոսալում, եթե պապան տաննա իլալ, խնդրալում տեսակապով ցույց տա սենյակս, խաղալիքներս, շորիկներս, հեքիաթների գրքերս… լո՜խ կարոտալում», – ասում է 6-ամյա Մարիան:
Հետաքրքրասեր աղջնակի «ինչու»-ներին մայրը պատասխաններ գրեթե չուներ:
Ստեփանակերտում Մարիան պարի, ավազանկարչության, ինչպես նաև մենթալ թվաբանության դասընթացների էր հաճախում:
2023թ․ սեպտեմբերի Արցախի բռնի տեղահանությունն ամբողջությամբ փոխել է Մարիայի ներաշխարհը․ տուն վերադառնալու պարզագույն ցանկությունը երազանք է մնացել․․․
Արցախցի փոքրիկը, կարծես թե, որոշակիորեն հարմարվել է նոր շրջապատին: Երևանում էլ է սկսել պարի ու նկարչության խմբակների հաճախել, բայց մտքերն ու հուշերը նրան ամեն օր Արցախ են տանում: Խոստովանում է՝ ամենամտերիմ ընկերուհուն՝ Մարիամին, ում հետ նույն բակից են և նույն օրն են ծնվել, միասին խաղացել ու դպրոց են հաճախել, շատ է կարոտում։
Ասում է՝ կարոտել է Արցախում թողած ամեն ինչին, իսկ ամենաշատը՝ քրոջից ստացած նվերն ու Արցախի համով պաղպաղակները։
Արմենը՝ Մարիայի հայրը, աշխատանքի բերումով վերջիններից է եղել, որ լքել է Արցախը՝ իր հետ բերելով աղջկա ամենասիրելի տիկնիկը․․․
Հեղինակ՝ Լուսինե Շադյան
Վիզուալ նյութերը՝ հեղինակի
Այս նյութը պատրաստվել է Ամփոփ Մեդիայի կողմից՝ «Պրոֆեսիոնալ մեդիան և քաղհասարակությունը միավորում են ուժերը՝ հանուն երկխոսության» ծրագրի շրջանակում, որն իրականացվում է Հանրային լրագրության ակումբի կողմից՝ Եվրոպական հանձնաժողովի ֆինանսավորմամբ։ Այստեղ արտահայտված տեսակետները պատկանում են հեղինակին (հեղինակներին) և պարտադիր չէ, որ արտահայտեն Եվրոպական միության պաշտոնական տեսակետը։
ՈՒՇԱԴՐՈՒԹՅՈՒՆ © Ampop.am կայքի նյութերն ու «Ամփոփ Մեդիա» տարբերանշանը կրող վիզուալ պատկերներն այլ աուդիովիզուալ հարթակներում հրապարակել հնարավոր է միմիայն «Ամփոփ Մեդիայի» և/կամ ԼՀԱ-ի ղեկավարության հետ համապատասխան համաձայնության դեպքում:
Փորձագետի կարծիք
Հրապարակվել է` 22/07/2024
