Եվրամիությունը պատրաստվում է ապրիլի սկզբին փորձագետների հատուկ խումբ գործուղել Հայաստան՝ օգնելու երկրին դիմակայել հիբրիդային սպառնալիքներին և արտաքին տեղեկատվական մանիպուլյացիաներին։ Այս որոշումը կայացվել է 2026 թ․ հունիսի 7-ին կայանալիք խորհրդարանական հերթական ընտրությունների նախաշեմին՝ հաշվի առնելով ժողովրդավարական գործընթացների նկատմամբ հնարավոր միջամտությունները։
Ի՞նչ է «հիբրիդային արձագանքման թիմը» և ո՞րն է դրա առաքելությունը
Ըստ ԵՄ դիվանագիտական ծառայության տվյալների՝ Հայաստան կժամանի 9-14 հոգանոց փորձագիտական խումբ, որը երկրում կանցկացնի 10-15 օր։ Առաքելության հիմնական նպատակն է աջակցել ՀՀ կառավարությանը՝ մշակելու ճգնաժամային կառավարման պլաններ հետևյալ ուղղություններով.
- Կիբեռհարձակումների կանխում. Պետական ենթակառուցվածքների պաշտպանություն թվային սպառնալիքներից։
- Տեղեկատվական մանիպուլյացիա. Պայքար օտարերկրյա ապատեղեկատվության դեմ, որի նպատակը հասարակության վստահությունը խաթարելն է։
- Ընտրական գործընթացների պաշտպանություն. Ապօրինի ֆինանսավորման և արտաքին քաղաքական ճնշումների չեզոքացում։
Ֆինանսական աջակցություն և քաղաքական հայտարարություններ
ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը շեշտել է, որ այս քայլն իրականացվում է պաշտոնական Երևանի խնդրանքով։
«Ճնշման տակ գտնվող ժողովրդավարությունները կարող են հույս դնել Եվրոպայի վրա։ Մենք Հայաստանին մենակ չենք թողնի արտաքին միջամտության դեմ»,- հայտարարել է Կալասը։
Այս աջակցությանը զուգահեռ, ԵՄ ընդլայնման հարցերով բարձր ներկայացուցիչ Մարթա Կոսը հայտնել է, որ Բրյուսելը պատրաստ է տրամադրել 12 միլիոն եվրո՝ հատկապես ընտրություններին ընդառաջ սպասվող հիբրիդային սպառնալիքներին հակազդելու համար։
Ո՞ր գերատեսչությունների հետ կհամագործակցեն փորձագետները
ԵՄ փորձագիտական խումբը սերտորեն աշխատելու է ՀՀ վարչապետի աշխատակազմի և Անվտանգության խորհրդի գրասենյակի հետ։ Համատեղ աշխատանքներ են նախատեսվում նաև հետևյալ կառույցների հետ.
- Կենտրոնական ընտրական հանձնաժողով (ԿԸՀ),
- Ներքին գործերի նախարարություն (ՆԳՆ),
- Պետական եկամուտների կոմիտե (ՊԵԿ)։
Եվրոպական կողմի համոզմամբ՝ Հայաստանն արդեն իսկ բախվել է ինտենսիվ հիբրիդային գործողությունների, և կանխատեսվում է, որ դրանք կսրվեն հունիսյան ընտրությունների նախաշեմին՝ խաթարելու ժողովրդավարական ինստիտուտների բնականոն աշխատանքը։
Ամփոփ Մեդիա
Աղբյուր՝ Ec.europa.eu
ՈՒՇԱԴՐՈՒԹՅՈՒՆ © Ampop.am կայքի նյութերն ու «Ամփոփ Մեդիա» տարբերանշանը կրող վիզուալ պատկերներն այլ աուդիովիզուալ հարթակներում հրապարակել հնարավոր է միմիայն «Ամփոփ Մեդիայի» և/կամ ԼՀԱ-ի ղեկավարության հետ համապատասխան համաձայնության դեպքում:
Փորձագետի կարծիք
Հրապարակվել է` 18/03/2026
