Տարածաշրջանում ռազմական գործողությունների կտրուկ սրման հետևանքով էներգակիրների համաշխարհային շուկան կանգնած է լուրջ մարտահրավերի առաջ։ Ինչպես տեղեկացնում է Reuters գործակալությունը, առնվազն 150 նավթային և գազային լցանավեր (տանկերներ) ստիպված են եղել խարիսխ գցել Պարսից ծոցի բաց ջրերում՝ Հորմուզի նեղուցի անցանելիության հետ կապված անվտանգային խնդիրների պատճառով։
Ռազմական գործողությունների աշխարհագրությունը
Համաձայն տվյալների՝ լցանավերի մեծ կուտակումներ են նկատվում Իրաքի, Սաուդյան Արաբիայի և Քաթարի ափամերձ ջրերում։ Իրավիճակը կտրուկ վատթարացել է Իրանի դեմ ԱՄՆ-ի և Իսրայելի իրականացրած օդային հարվածներից հետո, ինչը տարածաշրջանը ներքաշել է լայնածավալ ռազմական հակամարտության մեջ։
MarineTraffic հարթակի տվյալները փաստում են, որ տասնյակ նավեր անշարժ կանգնած են նեղուցի երկու կողմերում՝ սպասելով անվտանգ նավագնացության վերաբերյալ հստակեցումների։
Հարձակում Օմանի ափերի մոտ. սպառնալիքն արդեն իրական է
Իրավիճակի լրջությունը փաստում է նաև վերջին միջադեպը. Օմանի ափամերձ գոտում՝ Հորմուզի նեղուցի մոտակայքում, հարձակման է ենթարկվել Պալաուի դրոշի ներքո նավարկող «Skylight» նավթային տանկերը:
Օմանի ծովային անվտանգության կենտրոնի տեղեկացմամբ՝ հարձակման հետևանքով անձնակազմի չորս անդամ ստացել են վնասվածքներ, իսկ նավի մնացած 20 անդամները՝ 15 հնդիկ և 5 իրանցի, հարկադրված տարհանվել են:
Էսկալացիայի նոր փուլ. թիրախում նաև նավահանգիստներն են
Այս միջադեպը ևս մեկ անգամ ապացուցում է, որ Իրանի դեմ ԱՄՆ-ի և Իսրայելի օդային հարվածներից հետո տարածաշրջանում նավարկությունն անվտանգ չէ, և Իսլամական հեղափոխության պահապանների կորպուսի նախազգուշացումները սոսկ հայտարարություններ չեն: Ավելին, Օմանի իշխանությունները հաստատել են, որ անօդաչու թռչող սարքերի թիրախում է հայտնվել նաև Դուքմի նավահանգիստը:
Շուկայի արձագանքը և կանխատեսումներ
Ռազմական գործողություններն անմիջապես անդրադարձել են նավթի միջազգային գների վրա։ Brent տեսակի նավթի գինը կիրակի օրը արձանագրել է 10% աճ՝ հասնելով մոտ 80 դոլարի՝ մեկ բարելի դիմաց։
Էներգետիկ ոլորտի վերլուծաբանները նախազգուշացնում են, որ սա դեռ սահմանը չէ։ «ICIS» ընկերության էներգետիկայի գծով տնօրեն Աջայ Պարմարի խոսքով՝ թեև ռազմական հարվածներն ինքնին բարձրացնում են գները, սակայն առանցքային գործոնը մնում է Հորմուզի նեղուցի հնարավոր փակումը։
Եթե նեղուցով նավարկությունը լիովին դադարեցվի, նավթի գինը կարող է հատել 100 դոլարի շեմը։
Հորմուզի նեղուցը համարվում է աշխարհի ամենակարևոր «զարկերակը» նավթի արտահանման համար, որով անցնում է համաշխարհային նավթի մատակարարումների զգալի մասը։
Ամփոփ Մեդիա
ՈՒՇԱԴՐՈՒԹՅՈՒՆ © Ampop.am կայքի նյութերն ու «Ամփոփ Մեդիա» տարբերանշանը կրող վիզուալ պատկերներն այլ աուդիովիզուալ հարթակներում հրապարակել հնարավոր է միմիայն «Ամփոփ Մեդիայի» և/կամ ԼՀԱ-ի ղեկավարության հետ համապատասխան համաձայնության դեպքում:
Փորձագետի կարծիք
Հրապարակվել է` 01/03/2026
