Միասնական սոցիալական ծառայության հաղորդմամբ՝ մայիսի 10-ից սկսվել է ԼՂ բռնի տեղահանված քաղաքացիների կենսաթոշակի վճարման գործընթացը: Մայիսի 14-ից սկսել են նաև բռնի տեղահանվածների կեցության և այլ ծախսերը հոգալու նպատակով նախատեսված 40+10 հազար դրամ աջակցության ապրիլ ամսվա վճարման գործընթացները։
Պետբյուջեից 48 մլրդ դրամ ԼՂ-ից տեղահանված անձանց աջակցության համար
ՀՀ կառավարության որոշմամբ պետբյուջեից ավելի քան 48 մլրդ դրամ կհատկացվի ԼՂ-ից տեղահանված անձանց այս տարվա ապրիլ-դեկտեմբեր և նախորդ ամիսների համար ֆինանսական աջակցություն տրամադրելու նպատակով։ Այս գումարով նշված ժամանակահատվածի համար ամսական 50000 դրամ կամ 10000 դրամ աջակցություն կտրամադրվի շուրջ 106 000 մարդու։
Բնակարանային ապահովման պետական աջակցության ծրագիրը հաստատվել է
ՀՀ Կառավարությունը մայիսի 16-ին հավանություն է տվել ԼՂ-ից բռնի տեղահանված ընտանիքների բնակարանային ապահովման պետական աջակցության ծրագրին։
Ծրագիրն իրականացվում է աջակցության հետևյալ եղանակներից որևէ մեկի ձևով՝
- բնակարանի (կառուցվող շենքից բնակարան գնելու իրավունքի) կամ անհատական բնակելի տան ձեռքբերման հավաստագրի տրամադրում,
- անհատական բնակելի տան կառուցման հավաստագրի տրամադրում,
- գործող հիփոթեքային վարկի մարման աջակցություն։
Կարևոր է նշել, որ առաջարկվող բնակարանային ծրագիրն ընդգրկում է հիմնականում գյուղական բնակավայրերը։ Իսկ Երևանի 1-ին և 2-րդ գոտիները դուրս են աջակցությունից։ Ծրագրի մասին մանրամասներն ամբողջությամբ ներկայացված է ՀՀ աշխատանքի և սոցիալական հարցերի նախարարության կայքում՝ https://www.mlsa.am/news/665
Վանդալիզմը շարունակվում է
Մայիսի 13-ին տելեգրամյան ալիքներով տարածվեցին նկարներ, որոնցում երևում է, որ Ադրբեջանի տիրապետության տակ գտնվող Ասկերանի շրջանի Խնձրիստան գյուղի Հայրենական Մեծ պատերազմի և Արցախյան պատերազմի զոհերի հիշատակը հավերժացնող հուշահամալիրն ավիրվել է։
Ավիրվել են նաև Լեռնային Ղարաբաղի Հադրութի շրջանի Ազոխ գյուղում գտնվող Հայրենական պատերազմի և Արցախյան պատերազմի զոհերի հիշատակին նվիրված հուշարձանը, Քաշաթաղի շրջանի Աղանուս գյուղի խաչքար-հուշարձանը, Բերձոր քաղաքի Փառքի հուշահամալիրը, Անատոլի Զինևիչի կիսանդրին և այլն։ Ավիրել են նաև Մարտակերտ քաղաքի հուշարձան-խաչքարը, Մարտակերտի շրջանի Գետավանի հուշարձանը, Շուշիի Նելսոն Ստեփանյանի անվան պուրակը, Ստեփանակերտում քանդել են Ադմիրալ Իսակովի կիսանդրին, Մարշալ Բաղրամյանի հուշարձանը և այլն։ Ներկայացված ցուցակն ամբողջական չէ։ Այս փաստերն արդեն հրապարկվել են MONUMENT WATCH ակադեմիական հարթակում և Հայկական լեռնաշխարհի մշակույթի օմբուդսմենի գրասենյակի պաշտոնական էջերում։
ՄԱԿ-ի ՊԳԿ-ի կողմից մեկնարկել է արցախահայության աջակցության նոր ծրագիր
ՄԱԿ-ի Պարենի և գյուղատնտեսության կազմակերպության հայաստանյան գրասենյակը (ՊԳԿ) սկսել է ծրագիր, որի նպատակն է աջակցել փախստականներին՝ Հայաստանում հասանելիություն ունենալ գյուղատնտեսական հողերին։
Ծրագիրը, որը պաշտոնապես մեկնարկել է 2024 թվականի հունվարին, նպատակ ունի հեշտացնել փախստական ընտանիքների համար հողի հասանելիությունը՝ միաժամանակ խթանելով տեղական գյուղատնտեսական արտադրությունը ներքին սպառման համար:
Ամփոփ Մեդիա
Այս նյութը պատրաստվել է Ամփոփ Մեդիայի կողմից՝ «Պրոֆեսիոնալ մեդիան և քաղհասարակությունը միավորում են ուժերը՝ հանուն երկխոսության» ծրագրի շրջանակում, որն իրականացվում է Հանրային լրագրության ակումբի կողմից՝ Եվրոպական հանձնաժողովի ֆինանսավորմամբ։ Այստեղ արտահայտված տեսակետները պատկանում են հեղինակին (հեղինակներին) և պարտադիր չէ, որ արտահայտեն Եվրոպական միության պաշտոնական տեսակետը։
ՈՒՇԱԴՐՈՒԹՅՈՒՆ © Ampop.am կայքի նյութերն ու «Ամփոփ Մեդիա» տարբերանշանը կրող վիզուալ պատկերներն այլ աուդիովիզուալ հարթակներում հրապարակել հնարավոր է միմիայն «Ամփոփ Մեդիայի» և/կամ «Լրագրողներ հանուն ապագայի» ղեկավարության հետ համապատասխան համաձայնության դեպքում:
Փորձագետի կարծիք
Հրապարակվել է` 23/05/2024
