2025 թ․-ի առաջին ամիսն արդյունաբերական արտադրության ոլորտի համար մեկնարկեց անկմամբ։ Հունվար ամսին նախորդ տարվա հունվարի համեմատ ամբողջ արդյունաբերական արտադրության ծավալները նվազել են 10.4%-ով՝ կազմելով 190 մլրդ 547 մլն դրամ։
Ամենից շատ նվազել են մշակող արդյունաբերության ծավալները՝ 2024 թ. հունվարի համեմատ 16.2%-ով։ Սա արդյունաբերական արտադրանքի ամենամեծ չափաբաժինը կազմող ճյուղն է՝ շուրջ 60.8% (115 մլրդ 793 մլն դրամ)։
Հանքագործական արդյունաբերության և բացհանքերի շահագործման ծավալները նախորդ տարվա հունվարի համեմատ նվազել են 9.3%-ով։ Պատճառն այն է, որ մետաղական հանքաքարի արդյունահանումը նախորդ տարվա հունվարի համեմատ նվազել է 10.6%-ով՝ կազմելով 32,6 մլրդ դրամ։
Էլեկտրականության, գազի, գոլորշու և լավորակ օդի մատակարարման արտադրության ծավալները 2024 թ. հունվարի համեմատ աճել են 10%-ով։
Էլեկտրաէներգիայի արտադրությունը նախորդ տարվա հունվարի համեմատ աճել է 10.4%-ով` կազմելով 27,5 մլրդ դրամ, գազամատակարարման համակարգի միջոցով բաշխվող գազի վաճառքի ծավալները 2024 թ. հունվարի համեմատ աճել են 8.3%-ով` կազմելով 10,8 մլրդ դրամ։
Ջրամատակարարման, կոյուղու, թափոնների կառավարման և վերամշակման արտադրության ծավալներն էականորեն չեն փոխվել։ Նախորդ տարվա համեմատ դրանք նվազել են 0.2%-ով և կազմել ամբողջ արդյունաբերական արտադրության ընդամենը 1.2%-ը։
Համաձայն Վիճակագրական կոմիտեի տվյալների, մշակող արդյունաբերության ենթախումբ հանդիսացող հիմնական մետաղների արտադրությունը 2024 թ. հունվարի համեմատ նվազել է 32 մլրդ դրամով կամ 68.4%-ով։ Առաջին հայացքից այս անոմալ անկումը կարող է տպավորություն ստեղծել ոլորտում առկա ճգնաժամի մասին։ Մինչդեռ 2025 թ. հունվարի ծավալները համեմատելով 2022 և 2023 թթ. նույն ժամանակահատվածների հետ՝ ստանում ենք ծավալների աճ։ Հետևաբար, «անոմալ» աճ գրանցվել էր 2024թ․-ի հունվարին նախորդ տարիների համեմատ (Տես 2-րդ գրաֆիկը)։ Պատճառներին անդրադարձել է Հետքը։
25% անկում գրանցվել է խմիչքի արտադրության ծավալներում։ Այս ենթախումբը կազմել է մշակող արդյունաբերության 10.2%-ը՝ 11,8 մլրդ դրամով։
Մեծ աճ է գրանցվել ծխախոտի արտադրության մեջ՝ նախորդ տարվա հունվարի համեմատ 94.4%-ով՝ կազմելով մշակող արդյունաբերության 18.1%-ը կամ շուրջ 21 մլրդ դրամ։
Մշակող արդյունաբերության մեջ սննդամթերքի արտադրությունը կազմում է 29.4% (34 մլրդ դրամ)։ 2024 թ. հունվարի համեմատ այն աճել է 8.8%-ով։
Հեղինակ՝ Մարիա Խաչատրյան
ՈՒՇԱԴՐՈՒԹՅՈՒՆ © Ampop.am կայքի նյութերն ու «Ամփոփ Մեդիա» տարբերանշանը կրող վիզուալ պատկերներն այլ աուդիովիզուալ հարթակներում հրապարակել հնարավոր է միմիայն «Ամփոփ Մեդիայի» և/կամ ԼՀԱ-ի ղեկավարության հետ համապատասխան համաձայնության դեպքում:
Փորձագետի կարծիք
Հրապարակվել է` 26/03/2025
