Եվրոպական հանձնաժողովն այսօրվանից կասեցնում է առանց վիզայի մուտքը Վրաստանի դիվանագիտական, ծառայողական և պաշտոնական անձնագրեր ունեցողների համար։ Այսուհետ պաշտոնական նպատակներով Շենգենյան գոտի մուտք գործելու համար նրանցից կպահանջվի վիզա։ Սա առաջին դեպքն է, երբ կիրառվում է վիզաների կասեցման նոր՝ ուժեղացված մեխանիզմը։
Սա ԵՄ անդամ պետությունների որոշումն է ի պատասխան Վրաստանի կողմից ժողովրդավարության և հիմնարար իրավունքների ոլորտներում ստանձնած պարտավորությունների միտումնավոր ու շարունակական խախտումներին։ ԵՄ-ն գտնում է, որ վրացական իշխանությունների գործողությունները խաթարում են այն սկզբունքները, որոնց վրա հիմնված է վիզաների ազատականացումը։
2024 թվականի հոկտեմբերից սկսած՝ ցուցարարների, ընդդիմադիրների և անկախ լրատվամիջոցների նկատմամբ ճնշումները բացասաբար են անդրադարձել երկրում մարդու իրավունքների վիճակի վրա։ Բացի այդ, Վրաստանը հրաժարվել է համապատասխանեցնել իր վիզային քաղաքականությունը ԵՄ-ի հետ, ինչն անհրաժեշտ պայման է առանց վիզա ռեժիմի պահպանման համար։
Հանձնաժողովը նաև ուղեցույցներ է ընդունել անդամ երկրների հյուպատոսական և սահմանապահ ծառայությունների համար։ Խորհուրդ է տրվում խստացված հսկողություն սահմանել ԵՄ արտաքին սահմանը հատող Վրաստանի բոլոր քաղաքացիների նկատմամբ։ Վրաստանի իշխանությունների ներկայացուցիչները պարտավոր են օգտագործել իրենց դիվանագիտական կամ ծառայողական անձնագրերը պաշտոնական այցերի համար, հակառակ դեպքում կարող են ստանալ մուտքի արգելք։
Վրաստանի քաղաքացիները կստուգվեն ազգային և եվրոպական բոլոր շտեմարաններով, ներառյալ՝ Վիզաների և Շենգենյան տեղեկատվական համակարգերով։ Պաշտոնական անձնագրերով վիզայի համար դիմողների նկատմամբ կիրականացվի մանրակրկիտ ստուգում, կպահանջվեն հավելյալ փաստաթղթեր և կանցկացվեն հարցազրույցներ։ Տվյալների հավաստիության վերաբերյալ որևէ կասկածի դեպքում վիզայի տրամադրումը կմերժվի։
Ժամանակավոր կասեցումն ուժի մեջ է մտնում այսօր և կգործի 12 ամիս՝ մինչև 2027 թվականի մարտի 6-ը։ Եթե կառավարման և օրենքի գերակայության խնդիրները չլուծվեն, կասեցումը կարող է երկարաձգվել մինչև 24 ամիս։ Հանձնաժողովը նաև հորդորում է վրացական իշխանություններին ներգրավվել իրավիճակի շտկման գործընթացում։
Հաջորդ հնարավոր քայլը
Եթե իրավիճակը չփոխվի, Հանձնաժողովը կարող է որոշում կայացնել սույն սահմանափակումը տարածել Վրաստանի բոլոր քաղաքացիների վրա։ Սա նշանակում է, որ վիզային ռեժիմի լիակատար վերականգնումը դիտարկվում է որպես հաջորդ հավանական քայլ։
Ամփոփ Մեդիա
ՈՒՇԱԴՐՈՒԹՅՈՒՆ © Ampop.am կայքի նյութերն ու «Ամփոփ Մեդիա» տարբերանշանը կրող վիզուալ պատկերներն այլ աուդիովիզուալ հարթակներում հրապարակել հնարավոր է միմիայն «Ամփոփ Մեդիայի» և/կամ ԼՀԱ-ի ղեկավարության հետ համապատասխան համաձայնության դեպքում:
Փորձագետի կարծիք
Հրապարակվել է` 06/03/2026
